طفل زنان

كتبت بواسطة أ/ سمية عصام إبراهيم (أخصائية العلاج السلوكى )  مج لاتيهhttp://www.muglatte.com/

إزاى أتعامل مع ابنى الزنان ؟
كل حاجة أولادى عاوزينها بالزن والالحاح .. زن وصريخ طول الوقت مابيفصلش ، تعبت مبقتش عارفة  أعمل ايه ؟! ، دى مشكلة غالبا بتقابل كل الامهات .. طب ياترى نحل المشكلة دى ازاى؟


أولا: خلينا نعرف مين هو الطفل الزنان ؟
الطفل الزنان هو طفل عادى جدا ، والظاهرة دى بتكون طبيعية فيه وفى بعض الاحيان بتدل الظاهرة دى فيه على ذكاءه الشديد، إنه بيستعمل الاسلوب ده عشان يعبر عن نفسه، خدى بالك ان الطفل الزنان هو طفل مثابر عنده إصرار للوصول لهدفه  واصراره ده هو اللى بيوصله للزن  ، لان الطفل لسه معندوش صبر لانه لسه ميفهمش كل الصح وكل الغلط ،مش فاهم يعنى ايه الوقت المناسب!
الطفل حتى سن ال 3 سنوات لايدرك  شعور واحتياجات الآخرين ، كل اللى انتى محتاجاه انك تثبتى على عدم الاستجابة للزن ، فى أطفال كتير بتكون قدرتهم على الزن فائقة لحد مايحصل اللى هو عاوزه وده طبعا بيخلى الاب والام  يصابوا بالجنون  فبيعملوا حاجة من اتنين
1- يعنفوا الطفل
2- يخضعوا لرغبة الطفل والحاجة اللى هو عاوزها
والأسلوبين دول مع الأسف غلط جدا  ومش هيحلوا المشكلة بالعكس هيزودوها  وهيسيبوا آثار سلبية على شخصية الطفل قد نعانى منها بالمستقبل

 

طب ايه الاسباب اللى تخلى الطفل يلجأ للزن ؟؟
1- شعور الطفل بعدم الأمان
2- التدليل الزائد و إجابة طلباته دائما
3- الشعور بالملل
4- تقليد الآخرين
5- ممكن يكون جزء من تعبيره عن شخصيته المستقلة  ( طلما مش بشكل دائم )


طب هل الزن ده بيكون له أشكال مختلفة ؟؟
كل طفل بيختلف فى أسلوب تعبره حسب شخصيته،وحسب الدافع ورا سلوكه ده،و للزن أشكال كثيرة منها
1- العدوانية بالغضب والصراخ  ويترمى عالارض أو يضرب دماغه فى الحيطة .!
2- الشكوى الدائمة ومحاولة جللب تعاطف الآخرين
3- الإلحاح للحصول على مايوجد أمامه
4- التمادى فى الإلحاح أمام الآخرين على وجه الخصوص


طيب ياترى الطفل الزنان ده نتعامل معاه إزاى؟
1- حاول تلفتى انتباهه لأى حاجة تانية
2- حطى قواعد بالنسبة لطلبات طفلك ،حددى ساعات اللعب عالكمبيوتر  أو الكرتون ، حددى أيام معينة لشراء الحلوى ، لان الطفل حتى لو تمرد عالقواعد فهو محتاج ليها لأنها بتحسسه بالأمان بس هو بيتحداها عشان يختبر قوتها .!
3-اتفقى مع ابنك على عقاب إذا بكى أو ألح على شئ فى غير ميعاده، وكمان الاتفاق مع الآخرين المشاركين فى تربية الطفل عشان محدش يهد اللى انتى بتبنيه !
4- خلى بالك فيه جوانب إيجابية فى السلوك ده ممكن يكون بيعكس مهارة طفلك فى قدرته على التعبير عن نفسه وعدم الانسياق للآخرين بسهولة ، عشان كده عليكى بتوظيف الطاقات دى بشكل إيجابى بدلاً من كسر إرادة الطفل ، ممكن توليه مسئوليات تناسب قدراته وسنه ، أو تعلميه إزاى يعبر عن رأيه بطريقة مهذبة
5-ابعدى تماماً عن الضرب،  العنف عمره ماهيحل المشكلة
6-ابعدى عن أسلوب (هو كده) لانه هيخلى فى صراع دائم بينك وبين طفلك
7-ابعدى عن التحكم الزائد فى طفلك وعدم ا عطائه قدرة عالاختيار والتعبير عن نفسه
8-ابعدى تماماً عن إجابة طلبه لحد مايطلب بالشكل المناسب المهذب
9-ملامح وجهك ونظراتك لازم تعكس الحزم والصرامة وإنك مش هتتراجعى عن موقفك فى عدم إجابة طلبه لحد مايتكلم بالاسلوب المناسب
10- عشان تثبتى على موقفك ماتحطيش فى حسابك كلام الآخرين ومدى اقتناعهم بطريقة تربيتك لطفلك، اعملى اللى انتى شايفاه صح  انتى مش محتاجة تثبتى للناس حبك وكرمك مع أطفالك!
11-كونى قدوة لأطفالك فى طريقة عرض طلباتك
12-شجعى ابنك لما يطلب شئ بشكل مهذب
13-فى وسط ثورة الطفل تجبنى التعبير عن تفهمك لمشاعره أو محاولة توجيهه لأنه هيفهم انك بتنكرى مشاعره وبالتالى هيحاول يوصلها بشكل أكثر قوة أو هيلاقى ان سلوكه يجذب الانتباه للى هو عاوزه فهيستمر فى سلوكه غيرالمقبول ، استنى لحد ما يهدا وبعدين اتكلمى معاه
14- اوعى تقولى لطفلك انت قليل الادب لما يتكلم بطريقة غير لائقة ، قوليله انا متوقعة منك تتكلم بأسلوب أفضل من كده ،انامتوقعة منك تقول من فضلك ياماما
15- أوعى تخضعى لالحاحه عشان تخلصى من الزن لانك كده بتدعمى السلوك مش بتعالجيه
16-خليكى عارفة انك بتغير أسلوبك فى التعامل مع طفلك ،إنه هيزيد فى السلوك السيئ قبل التحسن : كل اللى عليكى هو الثبات لإن الطفل بيختبر قوة الحدود الجديدة .


 

مقالات مرتبطة
تعليقات

Copyright ©. All rights reserved. Hadeya for Arabic Software 2015 Madares Egypt